Belia Bahagia himagdil sin KURSUS KEPIMPINAN ASAS

- Sunday, November 2, 2008


Sandakan: Ha Taman Jalil Alip, pitsa 01-02 Novembir 2008, in Pejabat Belia dan Sukan Sandakan nagpaawn KURSUS KEPIMPINAN ASAS (Basic Leadership Course) para ha manga lungbu’ ba’gu waypa tumpukan. In parakala’ ini natarbilang hambuuk daing ha manga panawag –tawag sin Pamarinta Malaysia pa katan raayat in subay tuud sila magpatindug tumpukan sin lungbu’ ba’gu amun magad ha aturan sin pamarinta.

In manga Kapala iban sin kaibanan ahli himagdil sin Kurs ini labay daing ha panaabbiti sin Pejabat Belia dan Sukan. Sabab sin kita’ nila in Belia Bahagia kalagihan tuud palamurun ha prugram bihaini. Ha supaya in kapala iban ahli niya mabaut sin indaginis ilmu’ amun mahinang nila malim unu-unu na in tudjuhun nila pa hikarayaw sin lungbu’ ba’gu ha laum kawman iban pakatiluagan sin Malaysia.


Puas daing ha manga ilmu’ hindu’ ha 2 adlaw kurs in Belia Bahagia iban sin ahli niya maukab in pikilan pa jinisan kahalan ha katilibut nila iban mahinang sila suntu’ marayaw sin bangsa nila. Mula-mula na ha pasalan sin panali’ bukun marayaw gimuwa’ daing ha simud sin dugaing pihak di ha Sandakan palihalan sin kawman hiyuhulaan nila. Karna’ in pangatud sin kaibanan in kawman giyuwaan sin Belia Bahagia, kawman mamatay tau, atawa kan hipu’ sin jinisan karupangan. Daing ha ijin sin Tuhan in manga pikilan mangi’ yadtu inut-inut naig daing kanila labay daing ha suntu’ marayaw kita’ nila ha ahli sin Belia Bahagia.


In manga hinang maghagdil kurs atawa kan magpaawn dagbus prugram bihaini dihilan sataas-taas halga’ sin manga kapala sin Belia Bahagia. Karna’ tuput da ilmu, daing ha ijin sin Tuhan, madawhat sin manusiya’ unu-unu na in hajatun daing naman ha pakaradjaan pagdunya, pag-agama, iban magpatubu’ sin umagad magpalanyut sin bangsa.
Magsama-sama kita niyu magtuku-tiyukuhi pa hikalanyut sin Belia Bahagia. Hisiyu-siyu na daing kaniyu mabaya’ mahinang ahli parahi kami sulat ha e-mel: beliabahagia@gmail.com atawa tawagi kami ha umbul 0128191115 (MAI), 0128626963 (JOEFFRAN) atawa 0168446021 (YAZ).

PRUGRAM RAKAN MUDA WAWASAN DESA

Labels: - Tuesday, October 28, 2008



SANDAKAN: Sin pitsa 26-27 Oktubir yaun in Pejabat Belia dan Sukan simud pa Kampung Bahagia nagpaawn prugram RAKAN MUDA: WAWASAN DESA. In prugram ini nagmumpaat piyaragbus labay daing ha panukuhi sin Belia Bahagia. In manga jinisan nahinang ha laum sin duwa adlaw biya’ na sin maglanu’ kawman, panayam-nayam biya’ na basketball 3 on 3, mag-utung lubid, maghuyup tirigu, maglumba hiyuhukatan siki, iban manga kaibanan pa.

In maksud sin program WAWASAN DESA magtabang ha lungbu’ ba’gu ha laum iban ha guwa’ sin daira magpasambu pangingat palihalan halga’ sin kasambuhan sin kawman ha katiluagan niya. In prugram sin RAKAN MUDA ini ampa nakasud pa Kampung Bahagia ha laum sin 26 tahun.
Ha susungun in Belia Bahagia mataud pa in hinangun prugram iban sin Belia & Sukan pa hikarayaw sin katan di ha Malaysia.
Sekretariat

BELIA BAHAGIA NAGPI' NAKURA'

- Wednesday, October 15, 2008

Sandakan – Sin pitsa 12 Oktober 2008, lisag 9:00 mahinaat adlaw Ahad, in Belia Bahagia nag-inumpung ha iskul KAFA, Kg. Bahagia. In himagdil sin pag-inumpung manga kaanakan sin tau Kampung Bahagia, amun manga saddiya maglugtu’ maghidjatul sin hula’ bangsa iban agama. In maksud sin pag-inumpung ini nagpi’ sin hinangun nakura’ magparagan sin Belia Bahagia.
In paginumpung iyukab sin pagbassa duwaa ampa siyunuan sin pagdihil nasihat iban bulansang ha manga lungbu’ ba’gu nakahagdil. Pag-ubus yadtu dihilan na masa in pagpi’ nakura’ karna’ amura ini in subay unahan hinangun bat ha supaya in Belia Bahagia kakawaan sulat ha pamarinta.

Puas sin pagpi’ nakura’, maniyu-tiyu’ lilay in luun sin kaibanan aturan nakaluun ha laum sara sin Belia Bahagia. Ha supaya in manga ahli iban nakura’ di’ makahinang sin bukun ha laum aturan.


Sekretariat

PALITA HARI RAYA

-

SANDAKAN - Timagna’ ha bulan Puasa (1429) limabay yaun in kaanakan sin Tausug ha Kampung Bahagia, Sandakan, Sabah nakatali’ himinang hambuuk pagpanayam-nayam para ha katan raayat ha laum kawman. In paglami-lami nasabbut piyakugdan ha haylaya hikatu. In manga jinis sin panayam-nayam biya’ na sin, Palalihan Drama, Magtarasul iban Daman, Magkalang Nasyid, Magpangalay, Magkuntaw, Magpakita’ Batawi, Magbaki’-baki’, iban Magkuut-kuut. In gulalkabtangan sin panayam-nayam ini, PALITA’ HARI RAYA iban sin mawdu’ niya: RAMADHAN: HIKMA IBAN KAPAIDDAHAN PA KAWMAN.

In nangdahi sin katan prugram ha laum ini amuna in Palalihan Drama. In gulalkabtangan sin drama, “Hi Gahab”. Di ha drama ini piyaguwa’ in mawdu’ sin prugram, RAMADHAN: HIKMA IBAN KAPAIDDAHAN PA KAWMAN. In drama ini bukun nagmaksuri hi pamaba’-maba’ ha bangsa Tausug buat malaingkan in maksud niya pagpasampayan hadja sin manga natali’ sin kaanakan ha maghidjatul sin kawman labay daing ha hikma sin pagpuasa. Karna’ ha kawman Kg. Bahagia in kahalan sin tau niya biya’ da sin manga hal ha Lupa’ Sug iban kaibanan binaybayan hiyuhulaan sin Tausug – malummi’.

Mayta’ baha’ sabul in Tausug? In jawab niya bukun katan. Amura kuman, in manga kalummi-lummian magtambak ha sawm sin pamaybay nagsabab daing ha kulang in pagtulung-tabang maglanu’ sin lawm paghula’ iban wayruun paghalga’ sin kaibanan ha manga piyapanjari sin Tuhan di ha babaw gumi.

In paglanu sin kawman, ha baran subay tagnaan. Bukun isab maglanu’ hadja sin kawman in baran pasaran, atawa in baran lanuan sumagawa’ in kawman usibaan. Subay ra agarun in suntu’ hinang sin Junjungan ta ha pag-parayaw sin hula’ ha supaya inut-inut malawa’ in manga kanajis-najisan yari mimikit ha ginhawa iban ha kawman.

Bang in baran malanu’ in kawman mabahu’ tantu biya da kita simu’lug badju ba’gu in iyusal ta panghamut-hamut daing ha manga kalummi-lummian. Hangkan na subay ra mag-atap in katan. Nakalandu’ na kita niyu maglanu’ makalima hangka adlaw –magsambahayang – dahun natu’ na sambil lanuan in katilibut natu’. Karna’ laung sin Hadis “In paglanu’ hangtunga sin pag-iman”.

Mangman in katan hinang sin panganak Tausug di ha Sandakan magmumpaat kanila iban pakawman nila hawnu-hawnu na binaybayan. Misan in bangsa Tausug miskin ayaw na sambil lummian in kawman. Sabab in paglanu’ sin kawman di’ da pagbihun, in kalagihan natu’ hadja magtulung-tabang iban magbaut sin baran di’ magbugit sin kakaput-kaputan ha bukun tampat niya.

In nagpaawn sin panayam-nayam ini Belia Bahagia, tumpukan sin manga lungbu ba’gu Tausug di ha Sandakan. Bang kaw mabaya’ humati lanjal kaw pa:
http://www.beliabahagia.blogspot.com/. Atawa bang awn pikilan hikatabang mu pa hikasung sin hula’, bangsa, iban agama parahi kami sulat ha e-mel, beliabahagia@gmail.com. Ha susungun, insha’Allah mataud pa hinangun sin Belia Bahagia manunjuki pa kasambuhan iban kasajahitraan sin Bangsa natu' di ha Sandakan iban hakatilingkal Malaysia. Magtulung-tabang kita niyu maghinang marayaw pa hikasung sin katan.


Sekretariat

TARASUL IBAN KALANGAN SIN PRUGRAM PALITA' HARI RAYA

-


PALITA’ HARI RAYA

Bismillah hipamati’, Pa katan nakasaksi’,
Hari raya jatti’, Hipag aatay puti’
Palita Hari Raya, natali’ waypa in Puasa,
Maksud hipasampay, Hi labay ha drama
Pikilan natibuuk daing ha pagmisuara,

Paghantap sin panali’,Kimugdan ha bulan puti
In magbagay nagtali’, Kamaasan in gapi’

Palita’ Hari raya panayam-nayam,
Ha kampung Bahagia in tiyampatan
Katan kabataan nagtulung tabang
Sampay Kebudayaan Suluk lamud natarbilang

Tau maas ha kawman harus lagguun
Daing ha panuguti nila prgram napa awn
Bang hadja bihaini daran in paragbusun
Indaginis kasambuhan di’ kita niyu kabusun

Palita’ hari raya bukun hadja mag-drama
Magkalang solo, nasyid, magpangalay lamud na
Magkuntaw, magtawti, magkuut-kuut, magpakita’ batawi
Isab yari ra,Magbassa Qur’an, tarasul iban daman
sampay maghangkaragbus nabista

Bihaini na in panali sin kaanakan
Bat in katan makakita’ lain-lain kakuyagan
In hinang bihaini subay hinangun hangka tahun makaminsan
Misan tiyap-tiyap sadja puas Ramadhan

Bihaun ukabun namu’ na in Palita’
Indaginis kakitaan ayaw manga’ka’
Magkugkuyag kita niyu sambil kimita’
Sin kapaiddahan hikapaglagi pa ginhawa iban pa hula’

Nukilan hi al Rezai Musa

HIKMA SIN RAMADHAN

Bismillah hi pangukab, Tarasul hipasaplag,
Hilibut ta hi bukag, Kalu awn da imikag,

Ikag pa karayawan,Hinangun ta suntuan,
In bulan Ramadhan,Hipagsutsi sin baran,
Baran subay sutsihun,Hinang maksiat pakpakun,
Bat ibadat taymaun,Hampitun susungun

Dunya ini labayan, hapitan pagtanuman,
Binhi daing ha Tuhan, Suku’ sin ummat Islam,
Bulan Ramadhan Mulliya, Ubat daing ha Allah,
Piyardu in puasa, Pa Muslim sama-sama

Sama-sama tumali’, Ramadhan hinangun saksi’,
Mag-ubat sin pali’, Tumangka’ uhaw, hapdi',
Uhaw, hapdi’ tangkaan,Katan anggawta’ kakkangan,
Limut ayaw kansangan,Bat da magpaluntungan

Tarasul ampa bayta’, Nyawa hipaupiksa’,
Sambil laum paghula’, Subay malanu’ hapangita’
Dunya ayaw taykuran, Hinang katu’ sin Tuhan
Katilibut lanuan,ayaw sambil pasaran,

Tunga’ iman majukup, bang kita’ niyu mati’but,
Maglanu’ katilibut,sin indaginis kaput,
Bang gumi makasuwara,Katu’ tantu missara,
Magbugit kamu ayaw na, Pabukun lugal niya

Hi balik pa Ramadhan, padduman pa ummat Islam,
Bang maglanu’ sin baran, lapayun na in kawman

Tarasul timubtub na, Ramadhan timaykud na,
In kita niyu yari pa, ha Palita’ Hari raya,
Bang awn way kimugdan, kamu na in magpatuman,
In kami kaanakan, kulang pa kapandayan.

Nukilan hi al Rezai Musa

RAMADHAN

Ramadhan Oh..Ramadhan,
Ramadhan Oh Ramadhan

Bulan Puasa, ubat daing ha Allah
In maksud piyara, hi pagbaut ginhawa
Hangka tahun makaminsan
Haddiya pa bar-iman
Tungbas way salian
Yan in janji’ sin Tuhan

Ramadhan oh Ramadhan
Ramadhan oh Ramadhan
Ramadhan oh Ramadhan
Ramadhan oh Ramadhan

Bang ha bulan ramadhan
Pahala’ ibadat gandahan
Way miskin, way dayahan
Sama-sibu’ pa Tuhan

Bang Muslim di’ magpuasa
In dusa magga-ganda
Baran tantu binasa
Nalka’ in tiyatagama

Magtawbat na pa Tuhan
Himinang sin daakan
Ramadhan subay halgaan
Bulan tiyurun in Qur’an

Lirik: Nukilan hi al Rezai Musa

Drama “Hi Gahab”

Bismillah in tagnaan, sanglit pujji pa Tuhan,
amu in tagbaktulan, sin bulan Ramadhan

Bulan Ramadhan Mulliya, piyardu’ in Puasa,
Way pagkira bangsa ,himinang sama-sama,
Sama-sama himinang,sin katan daakan
Ma’siat layu-an, magsutsi ginhawa baran

Pahala’ sin puasa,sin Muslim di’ mabista,
Ayaw magduwa-ruwa Tuhan sangat kawasa

Tarasul hi pangukab palihalan hi Gahab
Anak piyararakag,napsu landu’ mulakab
Awn hambuuk waktu harap pa bay timudju
Inah, taymanghud way didtu, Unu baha’ in jimatu…

Nukilan hi al Rezai Musa

KABUGA’ PA TUHAN

Wajib ingatun, in maksud ta piya-awn
Mag-ibadat hinangun, pa hambuuk Tag-ipun
In Islam landu’ lingkat, hipu’ sin pami’at
Muslim subay di’ mutas, ha lubid sin Nabi Muhammad

Laila ha Illah Allah, puunan daing ha Allah
Yan in lubid niya, di’ magkira masa

In pagmabuga’ pa Tuhan,
ma’siat subay layuan
hinang marayaw gandahan
hipagpahugut iman

Rukun Islam lima, hag sin agama
Pardu’ in hukuman, hi tunay subay katan!

Kabuga’ kaw pa Tuhan, bat kaw magpaluntungan
Dunya ini labayan, Ahirat kakkal hulaan..

Kabuga’ kaw pa Tuhan, ayaw maghaman-haman
Kabuga’ kaw pa Tuhan…Kabuga’ kaw Pa Tuhan..

(Amu ini in puunan lirik sin SUNNAH, ha waypa pinda, kiyalang hi Althohamy Jul ha prugram Palita’ Hari Raya)


Puunan Lirik: Nukilan hi al Rezai Musa

Subscribe to: Posts (Atom)